Em irü'l-ümerai'l-kiram kebirü'l-küberai'l-fiham zu'l-kadri ve'l-ihtiram sahibü'l-izzi ve'l-ihtişam el-muhtassu bi-mezidi inayeti'l-meliki'l-alam Trablusşam beylerbeyisi dame ikbaluhu. Akza kuzati'l-müslimin evla vülati'l-muvahhidin ma'denü'l-fazlı ve'l-yakin hüccetü'l-Hakkı 'ale'l-halkı ecma'in varisu ulumi'l-enbiya ve'l-mürselin el-muhtassu bi-mezidi inayeti'l-meliki'l-muin Mevlana Trablusşam kadısı zide fazlihu tevki' refi' hümayun vasıl olacak malum ola ki Venedik balyosu dergah-ı muallama arz-ı hal gönd erüb vilayet-i Haleb'de olan Venedik konsolosu tebdil olunub eski konsolos vilayetine gitmek istedikde Venedik tercümanlarından Hristofolu nam tercüman Trablus'a bile alub giderken Trablus beyi olan Mansur oğlu Mehmed Bey mezbur tercüman içün bir Arab oğlanını tabanca ile urmuşsun deyü iftira idüb üzerine isyan edüb şer'ile ta'zir olunub icra'-i şer' olundukdan sonra yine salıvermeyüb elbette seni katl iderin deyü habs idüb havf virmekle beş bin florisin alınca habsden salıvermeyüb zülm ve te'addi itdüğün bildürüb tercüman-ı mezburun şer'ile hakkı alıverülmek ricasına hükm-ü hümayunum teleb itmegin buyurdum ki hükm-ü şerifimle vardukda ihzar-ı khusema kılub mukaddeman bu husus bir def a' şer'ile fasl olunmayub üzerinden on beş yıl murur itmiş değil ise mukteza-i şer' üzere teftiş ve tefahhus idüb göresün kazıyye 'arz olunduğu gibi olub bi-haseb-i şer' ü şerif sabit ve zahir olursa ol babda mukteza-i şer'-i kavimle 'amil olub mezkur tercümanın şer'ile müteveccih olan florisin hükm idüb bi-kusur alıverülüb hilaf-ı şer' ü şerif kimesne teallüb ve niza' itdürmeyesün bu defa' fasl-ı husumet idüb tekrar şikayete getürmelü itmeyesün şöyle bilesün 'alamet-i şerife 'itimad kılasun tahriren fi evail-i Şa'ban sene semane ve tıs'un ve elf. Be makam-ı Konstantiniyye