Sabıkan Bosna beylerbeyisi olub ber-vech-i arpalık Hersek sancağı mutasarrıfı olan İbrahim ve Nova kadısına ma'lum ola ki asitane-i sa'adetime 'arz-u hal sunub Venedik beylerinin adamlarından Alvize Daliva nam kimesne Venedikden Kotora nam hisara kendü ehl ve 'ayaliyle bir kıt'a rençber ve kayıkı ile giderken Kotor boğazına girdükde Novalulardan birkaç kimesneler levend kayıkına girüb mezburu validesin ve 'avratı ve oğlancukları ve sekiz nefer adamları vechle esbab ve eskalıyla alub Novaya getürüb bizim mukademan Kotorlardan br kimesnede dört yüz yigirmi guruş zımmetimiz kalub eda olunmamağla seni ahz iyledük deyü şer'-i şerife ve ahdname-i hümayunuma mugayir cevab virdüklerin sonra mezburu ve ehl ve 'ayyalin ve adamların salıverüb lakin bin beş yüz guruşluk esbaba elkoyub sen dahi bizüm hakkımızı ol canibde tahsil idüb bu canibe gönderdükden sonra senün esbabını virdüm deyü bi-gayr-i hak zülm ve te'addi iyledüklerin bildürüb bu makule vazi' şer'-i şerife ve ahdname-i hümayunuma muhalif olmağla mezkurun zımmeti mezburlardan alıverilmek ba'bında emr-i şerifim taleb itmegin buyurdum ki bu hususda her birinüz bi'z-zat mukayyed olub mezkur Venediklü'nün vech-i meşruh üzere şer'-I şerife ve ahdname-i hümayuna ve rıza-i şerife muhalif alınan bin beş yüz guruşluk esbabın her kimde ise bi-kusur sahibine veya ta'yin iyledüğü ademisine teslim idüb bizün Kotorluda hakkımuz vardur deyü ahdname-i hümayunuma mugayir te'allüd ve bahane ve inad itdürmeyesüz ve kayık binüb Kotor şimaline varub bu vechle fesad idenleri muhtac-ı 'arz olanlardan ise 'arz idüb değiller ise bu makule fesad idenler hakkında mukaddeman sadır olan evamir-i şerife ve ahdname-i hümayun muktezasınca her birine guşmal virülüb kayıkların bozdurub muhkem tenbih idesüz ki minba'ad vech-i meşruh üzere kimesne vazi' ve hareket iylemeyüb ehl-i fesada ruhsat virmeyesüz şöyle bilesüz 'alamet-i şerife 'itimad kılasuz tahriren fi evasıt-ı Muharrem ü'l-haram sene 1022. Be-makam-ı Edirne al-mahrusa