Kıdvetü'l-emâsil ve'l-akrân bölük-i halefin? emekdârlarından olub Elbasan ve Avlonya sancaklarından muhassal emvâl olan Bıcakcızâde Mehmed Bey - zîde kadruhû ba'de's-selâm- inhâ olunan oldur ki Venedik beyzâdelerinden üç cezire serdârı olub Ponne dimekle ma'rûf beyzâde üç kıt'a kadırga ve iki kıt'a ormancı ile Venedik'e giderken furtına olmağile dört kıt'a serdar üç kal'ası kurbunda karaya odurub paralandıkdan sonra Draç nâhiyesinde sakin eşkıyâdan kātîl Mahmud ve damadı Kara Mehmed ve Sarı Cafer nam kimesneler mezkûr Venediklulerin paralanan kadırgaları çıkarmağa mu'âvenet icun iki bin yedi yüz guruşlarından alub canilerinden tevzî' ve taksîm idub mu'âvenet eylediklerinden gayrı ellerinde olan ahidnâme-i hümâyûna muhâlif yüz otuz 'ubûd esirlerin ve cümle gemilerinin âlât ve esbâbın ve tobların alub kimin kal'aya kimin hâric-i kal'aya koyub ve bağzını arabalara yükledub karyelerine götürüb fesâd ve şenâ'at etmekle husûs-ı mezbûr ol zâman rikâb-ı hümâyûne 'arz olundukda Venedik beyleri kadîmden hulûs üzere dostluk ve muhabbetlerinden sâbit kıdem olmasıyle zikr olunan toblar ve sa'ir gemi âlâtı ve ticaret olunan esbâb ve erzâk ve esirlerin ve bilâ-sebeb alınan iki bin yedi yüz aded guruşların bi-kusûr alıvermek içün mukaddemâ sâdır olan hatt-ı hümâyûn ve emr-i şerîf mûcebince tekmîl olunmak bâbında emr-i şerîf verilmişdir vusûlünde gerekir ki sâdır olan emr-i şerîf mûcebince bu husûs mukayyed olub mezkûrlar âsitâne-i sa'âdet eşyânın hâlis muhlis dost ve muhabbet olanlarıyla ahidnâme-i hümâyun mûcebince aldıkları tobları ve sa'ir gemi âlât ve esbâbı ve esbâb ve erzâklarını ve esirlerini ve bilâ-sebeb alınan iki bin yedi yüz aded guruşların bi-kusûr mezkûrlardan ve gayrıdan muhassal her kimden zuhûr iderse alıvermeğe dikkat ve ihtimâm eyleyesiz ve bi'l cümle kātîl Mahmudun emvâl ve erzâkından mi lâzım gelur bi't-tamâm alıvermeden kimesneye muhâlefet etdirmeyesiz

bâkī ed-du'â

Receb Paşa

Tahrîren fî-evâsit şehr-i Recebi'l-mürecceb li-sene tis'a ve selâsîn ve elf