Partial transcription: Et hessendo aviso l'orator del Signor turcho esser zonto a Lio, fono chiamati li zenthilomeni deputati andarli contra, il forzo di Pregadi, imo tutti, e mandati zoso di Consejo, si andono a vestir di scarlato e andono a Lio a riceverlo, et condurlo nel suo alozamento fino a la habitation preparatoli, ch'è sul Canal Grando a cha' Corner a San Samuel. Et fono numero 24, et sier Zuan Antonio Dandolo come più vechio fece le parole. Il qual orator, nome . . . . è zà 5 anni fo in questa terra, sa pralar latin benissimo. Disse havia scorso pericolo eri nel venir, e se quelli dil so' brigantin non fosseno stà valenti homeni, si anegavano, ma intròno in Caorle, et questa matina si levono, et è zonto qui. Era smontato in la caxa di Consejo di X a Lio. Interpetre Hironimo Zivran da la Canzelaria, disse partì a di 29 April da Constantinopoli, et in 12 zorni vene da olacho a Ragusi, e da Ragusi in quà in zorni 14. Et parlando nel venir, disse quello voleva dir che la Signoria armava tante galie, come nel venir havia inteso? ch'el Signor non feva armata da 60 galie, per il chè li Bassà havia domandà al nostro Baylo quello voleva dir la Signoria feva armata et non li havia saputo risponder, e disse: «Il mio Signor vol far bona paxe con questa Signoria, si questa Signoria la vuol» etc. Li fo risposo: La bona mente de la Illustrissima Signoria in mantenir la paxe etc. Li fo fato le spexe per la prima sera.